• My Story

  • Arts we apply

    رسم على الكبايات الزجاج

    ممكن نستفيد بكبايات الجبنه ونرسم عليها ونحولها لطقم عليه رسمه من اختيارنا ... ودي تجربتي

     

     

    الرسم على المجات

    جددي المجات اللي عندك...

    فكري في افكار جديدة...😎
    اخرجي برا الصندوق...🤗 وطلعي طاقتك في الرسم ...
    طلعي المواهب...😉

    ده كان مج قديم عندي كان هدية من صديقة عزيزة 💖حبيت اجدده ورسمت عليه بالريليف الذهبي...حددت شكل القلب ورسمت اللي جه في بالي من زخارف😁😁

     

     

    الرسم على المجات

    أي شكل أو زخارف تحبيها ممكن تترسم على مج لون ساده

    ويبقى عندك مج مميز مش متكرر

    استخدمت ريليف ذهبي ولون زجاج أحمر ودهنتها ورنيش شفاف للحمايه

    بتتغسل بالليفه والصابون عادي 🖒 بس يفضل متتحطش في غسالة الأطباق للحفاظ عليها

    حرق على الخشب

    طقم معالق الخشب اللي عندك شكله تقليدي؟

    لو زهقتي منه ممكن تغيري شكله بالطريقه دي

    رسمت عليه بالقلم الرصاص وحرقت الرسم بجهاز الحرق على الخشب

    اختاري الرسمه اللي عاوزاها وغيري شكل ادواتك بسهولة وبأقل تكاليف

     

     

    ديكوباج

    ممكن تحطي لمسات فنية في مطبخك بأفكار جديدة وتزينيها بذوقك الخاص
    ***(Tea House)***
    فكرة مختلفه لباكتات الشاي المغلفه لقيتها في المكان الجميل والمتميز ده

    https://www.facebook.com/Be.Or.Not.Center/

    وعملتها بالدهانات وفن الديكوباج باستخدام ورق الرز وممكن تستخدمي ورق المناديل الملون وتختاري الرسمه اللي تعجبنك وتليق على مطبخك

    - الاول لونتها زي الصور باستخدام الاسفنجه بطريقة الطبطبه وعملت الرتوش الغامقه بالاسفنجه بردو
    - لزقت الاشكال من ورق الرز باستخدام غراء ابيض مخفف بمياه
    - بعد ما نشفت تماما صنفرت الزيادات من على الاطراف ودهنتها ورنيش شفاف للحمايه

    ودي صور لمراحل الشغل والشكل النهائي

    ديكوباج على المج

     

    كتير بيبقى عندنا مجات من شركات او مج قديم مبقناش حابين شكله وزهقنا منه ... انا هنا حبيت اجرب اغير شكل مج عندي كان عليه لوجو شركه وفي نفس الوقت كنت عاوزة اجرب فن الديكوباج على حاجه بنستخدمها مش مجرد

    قطعة ديكور ودي تجربتي زي ما انتو شايفين وتكلفتها كانت بسيطه جدا

    :وممكن تشوفو خطوات العمل هنا:

    https://www.facebook.com/joy.of.crafts/videos/232957174006841/?t=14

     

     

     

    سبورة للاطفال او في المطبخ لكتابة طلبات البيت

    فكرتي تعملي سبورة للأطفال وتحطيها في المطبخ علشان الاطفال يرسموا عليها وهما معاكي في المطبخ

    أوممكن تستخدميها علشان تكتبي عليها طلباتك او وصفات هتعمليها

    ده لوحه خشب صنفرتها ناعم ودهنتها بدهان السبورة الاسود موجود في المكتبات ولونت له اطار باللون الأزرق الاكريليك وقصيت صور الفاكهه من كتاب ألوان للأطفال ولصقتهم بالغراء وفي الاخر رشيت عليها سبراي مثبت ألوان

     

     

    الرسم على كبايات البلاستيك

    دي كبايات بلاستيك رسمت عليها للأطفال الشخصيات اللي بيحبوها ومن الناحية الثانيه رسمت اول حرف من اساميهم

    استخدمت اقلام دوكو ...ثابتة جدا على البلاستيك ومش بتتأثر بالغسيل

     

     

    شغل الخيط والمسمار String Art

    رشيت لوح الخشب سبراي دوكو بني وطبعا جهزت الرسمه اللي حشتغل عليها وطبعتها ولزقتها بالسيلوتيب على لوح الخشب

    قسمت حدود الرسمه لنقط على مسافات متساوية ودقيت عليهم المسامير برأس صغيرة بتتجاب من أي موان

    جبت خيط ذهبي من محل أدوات خياطه ولفيته على المسامير زي الشكل اللي شايفينه

    نهاية الخيط بيتعمل عقدة ونحط عليه نقطه من مسدس الشمع علشان يلصقه كويس

     

     

    رسم على القماش

     

    في العيد حبيت أعمل للاطفال هدية مميزة ليهم وفكرت في رسم بسيط يحبوه فاخترت الرسمه دي وعليهاجملة واحده لأخ لولد والتانية أخ لبنت موجوده في البوم الصور تحت وطبعا الفرق واضح (الفيونكة) :)))) واستخدمت الوان القماش..ممكن تبعتلنا لو عايز تحط رسمه او كتابه تعبر عنك.

     

     

    كوسترز خشب

     

    ايه رايك تعملي هدية بسيطه ومعبره عليها اسم صاحبتك 🤗🤗 تشوفها كل يوم الصبح وتفتكرك😍😍
    ده كوستر خشب دهنته باللون الأبيض وكتبت عليه الاسم بالخط العربي والرسم بالالوان الاكريليك وقلم التحديد الذهبي

    #coasters #كوستر

     

     

    الرسم على كاب رياضي

    احيانا بتبقي عاوزة لولادك كابات بلون معين ومش لاقيه؟؟😒

    بتدوخي وتلفي في المحلات كثير 🏃🏃

     

    وممكن تلاقي اللون في الاخر لكن عليه رسمه مش عاجباكي😳

    يا اما مش حتجيبي حاجه في الاخر 🤢

     

    في الحاله دي بقى ايه رايك تعملي لولادك كابات باللون اللي عاوزاه و عليها الرسمه اللي تختاريها ؟؟💃💃

    وكمان ممكن ترسميها بنفسك كمان ......في الفيديو ده حتلاقي خطوات الرسم عل الكاب بسهولة وادوات بسيطه ومتوفرة

    استخدمت اقلام ماركة (شاربي) ومتوفرة في المكتبات الكبيرة

    اقلام الوان قماش

    قلم رصاص

    التصميم المطلوب مطبوع على ورق ابيض

     

     

    الرسم على الزجاج

    🎁"الهدايا اليدوية تسعد الأشخاص أكثر من المصنعة حسب دراسة علمية"🎁

     

    كلام اتقال قريب في برنامج تلفزيوني وانا مقتنعه بيه جدا من زمان لان لما تعمل هدية مخصوص لشخص سواء حاجه كانت عاجباه وكان عاوز زيها او هدية عليها اسمه او رسمه باي نوع فن يدوي حتبقى حاجه مفيش زيها كثير وده بيميزها وبيحسس الشخص ده بالسعاده والتميز والاهتمام من اللي جابله الهدية وانه تعب وفكر علشان يعمله حاجه مخصوص ليه وده شئ له قيمته 💁‍♀️

     

    المج ده اتعمل هدية لصاحبته اللي كان عاجبها صورته على النت وكانت عاوزة واحد زيه وكانت سعيده بيه جدا 🥳🥳

    فعلا الهديه لما تتعمل مخصوص بيبقى ليها وقع خاص على صاحبها🤩

     

    استخدمت ريليف زجاج دهبي وألوان زجاج وبعد ما نشف كويس لمده يوم كامل

    مليت المج مياه وحطيته في الفرن على حرارة 250 لمدة نص ساعه

    وسبته ينشف يوم كامل☕️

     

     

  • Up Kitchen

    workshop

    عاوزه تجددي أدوات مطبخك لكن الاسعار غالية قوي؟ مطبخك مش متناغم مع بعض وادواتك مش لايقه على بعض؟ عاوزة افكار مختلفه ومميزة واحيانا ممكن تكون مطرقعه تجددي بيها مطبخك؟ بتلاقي مشكلة في انك تجيبي حاجات مطبخك بنفس الالوان او الروح؟ ليه تفَضَلي انك متجدديش المطبخ او تكسلي انك تاخدي الخطوة دي؟ علشان ال...
  • Contact Us:

    www.facebook.com/joy.of.crafts/

    www.instagram.com/joy.of.crafts/

    joyofcrafts.withsally@gmail.com

    All Posts
    ×